Iðngrein framtíðarinnar

Málm- og véltækniiðnaðurinn býr við traustan gjaldmiðil og góð ytri starfskilyrði. Höft hafa verið afnumin, verðbólga lítil, stöðugleiki ríkir og skattaumhverfið hagstætt. Allt leikur í lyndi í þessari tæknigrein og hún stækkar sem aldrei fyrr, þróast ört og er í flokki helstu útflutningsgreina Íslands. Vel menntað iðnaðar- og tæknifólk kemur í auknum mæli til starfa enda tryggir mikill virðisauki í þessari tæknigrein ágæta afkomu fyrirtækja og starfsmanna þeirra. Þannig hljómar sú framtíðarsýn sem fyrirtæki í málm- og véltækniiðnaði sjá fyrir sér að verði að veruleika árið 2017 ef rétt er haldið á málum hjá þeim sjálfum og stjórnvöldum.

Eðlilegt starfsumhverfi

Vissulega verður ýmislegt að breytast til batnaðar til þess að sýnin gangi eftir og því er nauðsynlegt að vinna skipulega á öllum vígstöðvum. Til að mynda er gengið út frá því að forsenda stöðugs starfsumhverfis til lengri tíma litið sé að Ísland gangi í ESB og að evran verði tekin upp svo fljótt sem aðstæður leyfa. Ekki hefur verið bent á aðrar leiðir til að tryggja hinn lífsnauðsynlega stöðugleika og fullreynt að íslenska krónan í samkeppni við alþjóða gjaldmiðla lætur einlægt undan síga og er helsta ástæða óstöðugleika í starfsumhverfinu. Það fljót verður að stemma að ósi; að öðrum kosti er flest annað unnið fyrir gýg og álitlegir möguleikar til að efla arðvænlega atvinnugrein koðna niður. Tæknigrein sem stefnir að því að treysta samkeppnisstöðu sína og auka útflutning verulega verður að búa að þessu leyti við sama umhverfi og helstu keppinautar hennar. Annað er ávísun á lakari lífskjör landsmanna. Þetta er aukinheldur grundvöllur þess að þjóðinni takist að víkja frá þeirri stefnu að nýta eingöngu náttúruauðlindir sínar til betri lífskjara en styrkja frekar tækni- og hugverkaiðnað til þess arna, enda er hér um að ræða skapandi iðngrein í bestu merkingu orðsins.

Fleiri í iðn- og tækninám

Sú bjarta framtíðarsýn sem nefnd var í upphafi þessarar greinar byggist einnig á því að stjórnvöldum, fyrirtækjum og skólum takist á allra næstu árum að efla verk- og tæknimenntun svo um munar. Enn fremur auðnist að auka áhuga unga fólksins á að læra þær tæknigreinar sem heyra til málm-, véltækni- og rafiðna. Allra síðustu árin má greina aukna aðsókn að málm- og véltæknigreinum enda eru margir skólanna sem kenna þær sífellt að bæta tækjakost sinn og aðlagast nýrri tækni. Þannig geta þeir boðið mjög áhugavert nám sem byggir í grunninn á handverkinu og þróast til þess að ná tökum á flóknum tölvustýrðum vélum og tækjum. Þeir sem hafa lokið slíku námi eru og verða mjög eftirsóttir starfskraftar í tæknivæddum fyrirtækjum.

Betri stjórn – meiri framleiðni

Mikið hefur verið unnið innan Samtaka iðnaðarins með fyrirtækjunum að því að koma á betri skipan mála hjá þeim með svonefndri áfangaskiptri gæðavottun. Hún hefur leitt til umtalsverðra framfara í stjórnun og þau fyrirtæki sem lengst eru komin í þeim efnum hafa nú fengið svonefnda ISO-vottun. Viðleitni af þessu tagi er grundvöllur sífelldra umbóta til aukinnar framleiðni sem tryggir afkomu fyrirtækja í harðri samkeppni á innanlands- og alþjóðamarkaði. Það er galdurinn við að bæta lífskjörin og vera fær um að nýta þau arðvænlegu atvinnutækifæri sem liggja fyrir fótum okkar í dag og næstu árin.