Perez Hilton líkti Grétu við Taylor Swift

„Ég held að hann sé bara að líkja mér við Taylor Swift út af öllum þessum ástarlögum sem hún hefur samið,“ segir Gréta Karen Grétarsdóttir söngkona, sem á dögunum vakti athygli stjörnubloggarans Perez Hilton.

Hilton birti myndband af Grétu Karen á vinsælli síðu sinni, Perezhilton.com, þar sem hún syngur lagið „Nothing“.

Þar líkir hann Grétu Karen við söngkonuna heimsfrægu Taylor Swift og hrósar laginu sjálfu hástert. Lagið samdi Gréta Karen ásamt Daniel Capellaro en nú hafa um 114 þúsund manns skoðað myndbandið á Youtube.

Lagið fjallar um ástarsorg og hvernig komast eigi yfir hana. Gréta Karen hefur verið búsett í Los Angeles í rúmlega fjögur ár þar sem hún hefur stundað tónlistarnám við Musicians Institute. Undanfarið hefur hún verið að semja nýja tónlist en einnig hefur hún verið að syngja inn á kvikmyndir. Ber þar að nefna kvikmyndina Theo, þar sem leikarar á borð við Miru Sorvino og Dakotu Johnson eru í aðalhlutverkum. Aðspurð segist Gréta vera ansi hissa á þessari athygli.

„Ég kíkti inn á Twitter-reikninginn minn og sá þá tíst um þetta þar sem ég var „tögguð“. Það tók mig þó smá stund að fatta að þetta væri inni á síðunni hans. Það var svolítið skemmtileg fyrirsögn á færslunni, „Sometimes less is more“, en ég er voðalega hissa á þessu öllu saman,“ segir Gréta Karen og bætir við að hún sé alveg með fæturna niðri á jörðinni þrátt fyrir athyglina síðustu daga. 

Hún stefnir ekki heim í nánustu framtíð en saknar einna helst að fá sér SS pylsu og lakkrís.