Fúsk í skúrnum!

Verkefnið „Allir vinna“ sem stjórnvöld hrundu af stað til þess að draga úr svartri atvinnustarfsemi og örva starfsemi innan byggingariðnaðarins hefur sýnt sig og sannað. Bæði hefur svört vinna nánast horfið og tekjur ríkissjóðs af byggingariðnaðinum aukist umtalsvert í formi vsk.-launatengdra gjalda. Auk þess fækkar í þeim hópi sem hafnar á atvinnuleysisbótum.

Eins og margir vita fór bílgreinin hvað verst út úr hruninu og dróst t.d. sala nýrra bíla saman um liðlega 90%. Ekki varð viðlíka samdráttur innan verkstæðisgeirans en flóran breyttist verulega. Upp spruttu „bílaverkstæði“ í bílskúrum og skemmum víða á höfuðborgarsvæðinu sem og um allt land þar sem boðið er upp á viðgerðir á svörtu!

Hærri reikningur

Því miður þá eru fjölmörg dæmi þess að fólk sem leitað hefur til þessara aðila, sem starfa fyrir utan alla samfélagssátt, hafi á endanum staðið uppi með mun hærri viðgerðarreikning en nauðsynlegt hefði verið ef viðkomandi hefði snúið sér strax til fagaðila. Leitað á verkstæði þar sem bæði þekking og tækjabúnaður er fyrir hendi til að gera við bíla.

Á hitt verður að líta að skiljanlegt er að fólk reyni allt til að draga úr kostnaði við viðhald og viðgerðir á einkabílnum og leiti þ.a.l. oft í fúskarana í skúrnum, en þá oft með ófyrirséðum afleiðingum.

Í ljósi góðs árangurs byggingariðnaðarins með verkefnið „Allir vinna“ hefur bílgreinin lagt það til við stjórnvöld oftar en einu sinni að verkstæði geti tekið þátt í því verkefni með það fyrir augum að sporna við þeirri gríðarlegu aukningu á svartri vinnu sem átt hefur séð stað í greininni.

Ljóst er að tekjur ríkissjóðs af bílaviðgerðum munu aukast ef verkstæðum er gert kleift að taka þátt í verkefninu og kostnaður almennings vegna viðgerða mun minnka.

Umferðaröryggi

Þetta er ekki bara spurning um að sporna við og stoppa svarta vinnu, heldur snýr þetta líka að umferðaröryggi. Ótal dæmi eru um að bílar sem lent hafa í höndunum á aðilum sem hvorki hafa þekkingu eða tæki til að gera við, koma svo á endanum inn á fagverkstæði eftir „viðgerðir“ fúskarans sem stórhættulegir bílar í umferðinni. Ástæðan er sú að „viðgerðin“ sem eigandinn stóð í góðri trú með að væri góð og gild er það alls ekki. Ekki var um viðgerð að ræða, frekar skemmdarverk vegna skorts á réttum tækjum og þekkingu á verkinu. Þetta er málefni sem nauðsynlegt er að taka á og stoppa. Fagmennska á öllum sviðum bílgreinarinnar sem og svört vinna verðu eitt af stóru málunum á aðalfundi Bílgreinasambandsins sem haldinn verður á Hótel Sögu 21. mars nk.