Lífeyrisskuldbindingar hins opinbera jukust

Áfallnar lífeyrisskuldbindingar hins opinbera jukust um tæpa 20 milljarða króna í fyrra og voru 436 milljarðar króna um síðustu áramót. Þær hafa samtals aukist um 168 milljarða króna frá því í árslok 2007. Þetta kemur fram í bráðabirgðauppgjöri fjármála hins opinbera, en undir þann hatt falla ríkissjóður og sveitarfélög landsins.

Um er að ræða að mestu halla B-deildar Lífeyrissjóðs starfsmanna ríkisins (LSR), sem var aflögð árið 1997. Þeir sem borguðu í hana gátu þó haldið því áfram. Lífeyrisþegar B-deildar fá eftirlaunagreiðslur óháð innborguðum iðgjöldum og ávöxtun þeirra. Með öðrum orðum er lífeyrir þeirra með ríkisábyrgð.

LSR hefur ekki birt uppgjör fyrir síðasta ár. Fréttablaðið greindi hins vegar frá því í ágúst 2012 að óuppgerð áfallin tryggingafræðileg skuld deildarinnar í lok árs 2011 hefði verið 461 milljarður króna. Stærstur hluti hennar lendir á hinu opinbera og sá hluti hækkaði um tæpa 20 milljarða króna í fyrra. Ef byrjað hefði verið að greiða skuldina um mitt síðasta ár hefðu opinberir aðilar þurft að greiða um átta milljarða króna á ári. Þær greiðslur hefðu síðan toppað árið 2024, þegar þær yrðu um átján milljarðar króna á ári, en þær myndu síðan lækka jafnt og þétt eftir það.

Ríkissjóður hóf að greiða inn viðbótargreiðslur í B-deildina á árinu 1999 til að mæta þessum framtíðarskuldbindingum. Út árið 2008 nam samtala þeirra greiðslna 75 milljörðum króna umfram lagaskyldu. Eftir hrun var ákveðið að hætta þessum viðbótargreiðslum. Með því veltu menn vandanum á undan sér.

- þsj