Kjósum Stefán Einar til áframhaldandi forystu

Nú eru í framboði til formennsku í VR tveir einstaklingar. Annar er Stefán Einar Stefánsson, sem hefur sinnt starfinu síðastliðin tvö ár af mikilli eljusemi og dugnaði. Á síðustu tveimur árum hefur hann barist fyrir auknum réttindum félagsmanna sinna, tekið þátt í að tryggja þeim launahækkanir sem nema að lágmarki 11,4% auk þess sem lágmarkslaun í félaginu hafa hækkað um 23,6% á sama tíma.

Undir forystu Stefáns Einars tók VR við þjónustu við atvinnuleitandi félagsmenn sína og er nú svo komið að félagið hefur á sínum snærum átta vinnumiðlara og ráðgjafa. Þjónustan tryggir að VR veitir umfangsmeiri þjónustu við félagsmenn sína en nokkurt annað stéttarfélag í landinu.

Eitt af kosningaloforðum Stefáns Einars var að koma á fót jafnlaunavog til að útrýma kynbundnum launamun. Félagði kynnti nýlega Jafnlaunavottun VR til sögunnar og nú þegar hafa um 30 fyrirtæki skráð sig til þátttöku. Þá hefur Stefán Einar barist fyrir því að stefnumótun í starfsmenntamálum verði sett á laggirnar og er sú vinna nú þegar hafin. Þá hefur Stefán Einar lagt áherslu á það að kjarasamningsgerðin verði tekin fastari tökum og verði betur undirbúin en hún hefur verið síðustu ár. Mikilvægt er að tryggja að sem flest sjónarmið komist að og hefur hann lýst því opinberlega yfir að Trúnaðarráð félagsins muni koma saman í aprílbyrjun til þess að hefja fyrstu skrefin í kjarasamningsundirbúningnum.

Eru þetta bara örfá dæmi um þá sigra sem hafa unnist síðustu tvö ár. Mikilvægasti sigurinn er þó sá að eftir mikil átök í kringum félagið síðustu ár á undan hefur tekist að skapa starfsfrið í kringum þetta stærsta stéttarfélag landsins eins og ný vinnustaðagreining Capacent sýnir. Þá hefur traust félagsmanna til VR aukist um 33% frá því að Stefán Einar tók við.

Fram undan er gerð nýrra kjarasamninga, en stefnt er að undirritun þeirra í lok þessa árs. Það er því brýnt að félagsmenn VR njóti þeirrar uppbyggingar á félaginu sem staðið hefur verið að síðustu tvö ár og þeirra krafta sem Stefán Einar hefur lagt í kjarabaráttu félagsmanna VR á þeim tíma. Sem trúnaðarmaður VR hef ég fengið að kynnast því góða starfi sem Stefán Einar hefur unnið síðustu tvö ár. Í því árferði sem nú ríkir mega félagsmenn ekki við því að skipt verði um skipstjóra í miðri ferð, stöðugleiki skiptir hér miklu máli.

Þess vegna skulum við kjósa Stefán Einar til áframhaldandi forystu í öflugasta og stærsta stéttarfélagi landsins.