Felix og Reynir Þór fara Alla leið

"Við verðum tveir fastir og fáum tvo mismunandi gesti í hvern þátt til að hjálpa okkur. Svo verður fólk í sal sem getur haft áhrif á dóm okkar," segir Felix Bergsson. Hann mun sjá um Eurovision-þættina Alla leið þetta árið ásamt Reyni Þór Eggertssyni.

Þættirnir verða byggðir upp á svipaðan hátt og undanfarin ár og munu öll lögin sem keppa í Eurovision í Malmö í maí verða skoðuð. Fyrsti þátturinn fer í loftið laugardaginn 13. apríl og verða þeir svo sýndir næstu fimm laugardaga þar á eftir, eða allt fram að keppni.

Reynir Þór hefur lengi verið tengdur við Eurovision-heiminn og þykir einn helsti spekingur landsins í þeim málum. Áhugi og þekking Felix á Eurovision hefur þó farið hljóðar en hann segist þó vera mikill aðdáandi keppninnar þó þekking hans sé hvergi nærri jafn mikil og Reynis. "Reynir er að finna líkindi með lögum sem eru að keppa í ár og öðrum sem tóku kannski þátt í undankeppnum einhverra landa fyrir mörgum árum síðan. Hann kemur með alls kyns svoleiðis innslög inn í þættina, sem er rosalega gaman," segir hann.

Felix er keppninni þó sæmilega kunnur og fór til að mynda með Vinum Sjonna til Düsseldorf árið 2010 sem blaðafulltrúi þeirra. Hann hefur þó aldrei tekið þátt sjálfur, þó það hafi komið til tals á árum áður. "Það voru umræður um það á þeim tíma sem ég var poppstjarna, en það tímabil entist svo stutt að það varð aldrei neitt úr því," segir hann og hlær. "Ætli ég sé ekki orðinn of seinn núna, þó það sé aldrei að vita," bætir hann við.