Sá veit er víða ratar

Í frumvarpi til laga um ný náttúruverndarlög er margt gott og gilt og ber að taka fagnandi. En betur má ef duga skal. Inn á milli eru gloppur sem vert er að staldra við og skoða nánar. Ég vil því hvetja fólk og félagasamtök sem telja sig málið varða að senda inn athugasemdir á vef Alþingis fyrir 8. febrúar næstkomandi. Með því mætti reyna á það samráð sem oft hefur verið bent á að viðhaft sé af hálfu stjórnvalda. Því með samráði má gera gott betra, ekki satt?

Þá er best að leita til og hlusta á þá sem kunnugastir eru málum. Það eru þeir aðilar sem árum saman hafa farið um fjöll og firnindi og þekkja því landið eins og lófann á sér. Mikilvægt er að fara ekki í manngreinarálit með hvaða hætti fólk ferðast, en þar er átt við gangandi og akandi útivistarfólk og auðvitað einnig hestamenn sem hafa margt til málanna að leggja.

Ferðafrelsi er okkur Íslendingum í blóð borið og þráin eftir því að komast út í náttúruna sterk. Okkur ber að sjá um að allir fái notið náttúrunnar, líka þeir sem vegna öldrunar, veikinda, fötlunar eða ungs aldurs geta ekki ferðast um nema til komi vélknúið ökutæki.

Á vefnum hafa verið hatrammar umræður með ásökunum um að nú eigi að nota fötlun sem átyllu til að spæna um allt á ökutækjum án ábyrgðar, umræða sem oft er lituð af misskilningi og skorti á því að geta sett sig í spor annarra. Slíkt tel ég vera umræðu á villigötum. Mikilvægt er samt að raddir allra fái að heyrast. Er það einlæg von mín að á okkur verði hlustað og samráð verði haft til úrbóta.

Landið er sameign okkar allra og okkur ber að ganga þannig um að við skilum því eins til komandi kynslóða og við tókum við því, ef ekki enn betra. En ég spyr hvers virði er náttúran ef enginn fær að njóta hennar? Til að unna þarf að þekkja og það gerum við með því að ferðast og kynnast landinu. Of mörg boð og bönn eru sjaldnast sú leið sem vænlegust er til bóta. Veljum því frekar fræðslu og leiðsögn. Það er vænlegra að gefa sér tíma til að fara yfir málin á yfirvegaðan hátt og finna lausnir sem leiða til sátta þannig að allir geti vel við unað. Ég bið því þingmenn að skoða hug sinn áður en þeir samþykkja náttúruverndarlögin óbreytt og skora á alla að kynna sér málið á www.ferdafrelsi.is.