Dorrit mætti í íslenskri hönnun

Heklugos var haldið í annað sinn á fimmtudaginn á Ásbrú í Eldey frumkvöðlasetri þar sem fjöldi manns fjölmenntu á viðburðinn til að kynna sér hönnun á Suðurnesjum.  Heiðursgestir voru Ólafur Ragnar Grímsson forseti Íslands og Dorritt Moussaieff‎ forsetafrú sem var klædd í peysu frá Mýr Design.

Heklugosið er samstarfsverkefni Heklu, atvinnuþróunarfélags Suðurnesja og þróunarfélags Keflavíkurflugvallar. Þátttakendur og stuðningsaðilar eru SKASS, samtök skapandi Suðurnesjakvenna, Bláa Lónið og Duty Free Fashion.

Fjölmargir sjálfboðaliðar komu að framkvæmd viðburðarins ásamt þeim hönnuðum sem tóku þátt. Að tískusýningunni komu fjöldi fatahönnuða auk hárgreiðslu- og förðunarfólks frá Suðurnesjum.  

Fatnaðurinn var frá ELLA, Farmers Market, Freebird, Me me, Huginn Muninn, Mýr, Kron kron og Spiral. Ína Hrund Ísdal var stílisti og um förðun sáu Ásdís Sverrisdóttir og Vala Grand. Um hár sá hárgreiðslustofan Draumahár en skór voru frá Skóbúðinni í Keflavík.