Fórnarlamb Polanskis segir sögu sína

Samantha Geimer, fórnarlamb leikstjórans Romans Polanski, hefur gefið út bók sem fjallar um nauðgunina sem hún varð fyrir á heimili Jack Nicholson árið 1977. Geimer var aðeins þrettán ára þegar árásin átti sér stað.

Bókin ber titilinn The Girl og á bókakápunni er mynd af Geimer sem Polanski tók af henni aðeins þremur vikum áður en hann nauðgaði henni. Samkvæmt útgefanda mun bókin veita lesandanum nýja sýn á sögu sem hefur áður aðeins verið sögð út frá sjónarhorni leikstjórans.

„Ég er meira en fórnarlamb kynferðisofbeldis og ég kýs að segja sögu mína núna – að deila henni og um leið endurheimta sjálfsmynd mína,“ sagði Geimer um tilurð bókarinnar.