Aron í banastuði | Góður dagur Íslendingaliði

Kiel, Flensburg og PSG unnu öll góða sigra í Meistaradeildinni í handbolta í dag. Aron Pálmarsson fór á kostum þegar Kiel skellti Orlen Wisla Plock 34-25 á heimavelli og skoraði 9 mörk fyrir lærisveina Alfreðs Gíslasonar.

Kiel er á toppi B-riðils eftir sigurinn í dag en Kiel var mun betri aðilinn í leiknum og var 16-11 yfir í hálfleik.

Aron Pálmarsson var markahæstur með 9 mörk og Marko Vujin skoraði 7. Filip Jicha skoraði 6 mörk og Guðjón Valur Sigurðsson lét sér nægja að skora 2. Petar Nenadic skoraði 9 mörk fyrir pólska liðið.

Flensburg marði Aalborg með einu marki 27-26 í Danmörku í dag. Ólafur Gústafsson skoraði eitt mark fyrir Flensburg sem er í öðru sæti D-riðils, þremur stigum á undan Aalborg eftir sigurinn í dag.

Holger Glandorf  og Thomas Mogensen skoruðu 7 mörk hvor fyrir Flensburg og Drasko Nanadic 6. Johan Mikael Jakobsson og Havard Tvedten skoruðu 6 mörk hvor fyrir danska liðið.

PSG vann öruggan sigur á Dinamo Minsk í Hvíta-Rússlandi 35-29. PSG fór þar með í annað sæti C-riðils, tímabundið að minnsta kosti en Barcelona er með fjórum stigum meira á toppnum.

Hvorki Ásgeir Örn Hallgrímsson né Róbert Gunnarsson skoruðu fyrir PSG. Mladen Bojinovic skoraði 8 mörk og Marko Kopljar og Igor Vori skorðu 7 mörk hvor. Uros Bundalo skoraði 7 mörk fyrir Dinamo.