Kóngurinn í Kiel

 Kiel vann í fyrrakvöld sinn fjórða Þýskalandsmeistaratitil undir stjórn Íslendingsins Alfreðs Gíslasonar og hefur nú alls unnið tíu mikilvæga titla síðan hann tók við liðinu sumarið 2008.

Sigurganga Kiel ætlar engan enda að taka og liðið á nú möguleika á að vinna þrennuna annað tímabilið í röð. Tveir titlanna eru þegar komnir í hús, Þýskalandsmeistaratitilinn á þriðjudagskvöldið og bikarmeistaratitilinn í apríl.

Fram undan er síðan úrslitahelgi Meistaradeildarinnar þar sem Kiel-liðið getur endað erfitt tímabil með sögulegri þrennu.

Fimmfaldur meistaraþjálfari

Alfreð hefur nú gert fimm lið að Þýskalandsmeisturum, því sjö árum áður en hann kom til Kiel vann SC Magdeburg titilinn undir hans stjórn, fyrst liða frá Austur-Þýskalandi eftir sameiningu landsins.

Alfreð fór þaðan til Gummersbach en fékk síðan tækifærið sumarið 2008 til að taka við sigursælu liði Kiel af Zvonimir Serdarusic sem var þá nýbúinn að gera Kiel að meisturum í ellefta sinn.

Misst heimsklassaleikmenn

Kiel-liðið hefur ekkert gefið eftir síðan Alfreð settist í þjálfarasætið og það þrátt fyrir að liðið hafi gengið í gegnum miklar breytingar á þessum tíma. Alfreð hefur meðal annars þurft að fylla skörð heimsklassa leikmanna eins og Frakkans Nikola Karabatic og Svíans Kims Andersson og í sumar hverfa á braut franski markvörðurinn Thierry Omeyer og franski leikstjórnandinn Daniel Narcisse.

Að þessu sinni var Alfreð með tvo landa sína í liðinu. Aron Pálmarsson var að vinna sinn þriðja Þýskalandsmeistaratitil með Kiel en Guðjón Valur Sigurðsson er á sínu fyrsta tímabili og varð nú loksins Þýskalandsmeistari eftir ellefu ára spilamennsku í þýsku deildinni.

Kiel hefur leikið 167 deildarleiki undir stjórn Alfreðs Gíslasonar á þessum fimm tímabilum og aðeins tapað tólf þeirra.

Guðmundur sá eini

Það eru aðeins ellefu þjálfarar sem geta stært sig af því að hafa unnið Alfreð Gíslason hjá Kiel og bara einn þeirra, Guðmundur Guðmundsson, hefur afrekað það tvisvar sinnum. Guðmundur stýrði Rhein-Neckar-Löwen til sigurs í báðum leikjunum á móti Kiel tímabilið 2010-11.

Löwen vann þá fyrri leikinn á heimavelli í desember, 29-26, og seinni leikinn á útivelli í apríl, 33-31. Það var reyndar nóg af Íslendingum sem hjálpuðu Guðmundi að landa þessum tveimur sigrum því Ólafur Stefánsson, Róbert Gunnarsson og Guðjón Valur Sigurðsson léku þá allir með Ljónunum.

Alfreð hefur reyndar hefnt vel fyrir þetta því Kiel hefur unnið fjóra síðustu leiki sína á móti Rhein-Neckar-Löwen, þar af þrjá þá síðustu með samtals 25 marka mun.