Upplifði martröð hljóðfæraleikarans

Gítarleikarinn Ómar Guðjónsson fór heldur óvarlega í matseldinni á dögunum og skar næstum því af sér fingurinn. Það var sæt kartafla sem varð þessum fingrafima listamanni að falli.

„Ég var eins og svo oft áður að undirbúa einhvern kvöldmat og var nýbúinn að kaupa mér svona japanska sveðju, hníf með risastóru blaði,“ segir Ómar sem hafði lengi dreymt um hníf af þessu tagi.

„Svo var ég í Þýskalandi og ákvað að láta slag standa. Og síðan daginn eftir var ég kominn heim og að elda, og nota hnífinn í allt, ekki bara það sem á að nota hann í. Ég fór því í sætu kartöflurnar og þá gerðist þetta. Ég hélt utan um sæta kartöflu og skar með hægri og þá datt hnífurinn einhvern veginn skakkt af kartöflunni í einhverjum átökum og beint inn í litla puttann á vinstri,“ segir Ómar sem er rétthentur.

Ómar segir að hnífurinn hafi farið í gegn um hluta af sin og til að byrja með vissi hann hreinlega ekki hvort puttinn hefði farið af eða ekki.

„Ég vissi ekki hvort hann var af eða á þegar ég var á leiðinni upp á spítala, búinn að vefja einhverju utan um þetta í algjöru sjokki.“

Ómar var saumaður og settur í gifs, og þurfti að gefa fingrinum langt frí, en læknar segja að hann muni ná sér að fullu.

„Ég er búinn að taka Eric Clapton á þetta undanfarið og sleppa litla putta,“ segir Ómar, sem hefur þó ekki snúið baki við hnífnum, en ætlar þó að passa sig við eldamennskuna héðan í frá.

„Ég ætlaði að senda lækninum hnífinn en svo hafði ég það ekki í mér. En ég mun ekki nota hann í annað en það sem hann er ætlaður fyrir. Þetta er búið að vera mín martröð frá fermingu, að skera af mér puttana. Við erum öll svo stutt frá þessu. Maður þarf ekki annað en að gleyma sér aðeins í eldhúsinu. Annars held ég að pabbi sé að leita að svona kjötiðnaðarhanska fyrir mig, svona stálgrifflu.“