Langþráður sigur hjá Eisenach

Hannes Jón Jónsson skoraði sex mörk og Bjarki Már Elísson fjögur er Eisenach lagði Balingen, 29-24, í þýsku úrvalsdeildinni í handknattleik.

Eisenach er þrátt fyrir sigurinn í næstneðsta sæti deildarinnar.

Í neðsta sæti er lið Emsdetten sem tapaði gegn Lemgo í kvöld, 23-33. Ernir Hrafn Arnarson og Oddur Gretarsson skoruðu sitt hvort markið fyrir Emsdetten.

Björgvin Páll Gústavsson og félagar í Bergischer töpuðu naumlega, 25-26, fyrir Hannover-Burgdorf. Arnór Þór Gunnarsson lék ekki með Bergischer vegna meiðsla.

Ólafur Gústafsson komst ekki á blað hjá Flensburg er liðið sótti fimm marka útisigur, 24-29, til Wetzlar. Ivano Balic skoraði þrjú mörk fyrir Wetzlar í leiknum.