Bjarni skrifaði undir með símanum

Bjarni Benediktsson fjármálaráðherra skrifaði í dag undir tilkynningu frá ráðuneytinu til Alþingis með rafrænum skilríkjum.

Í tilkynningu frá ráðuneytinu segir að með þessu hafi verið stigið mikilvægt skref í rafrænni stjórnsýslu og brotið blað í sögu Stjórnarráðsins, en hefð hefur verið fyrir því að slíkar tilkynningar séu undirritaðar af ráðherra með bleki á pappír.

„Með þessu höfum við tekið stefnu í átt að auknum rafrænum samskiptum í stjórnsýslunni, sem hefur í för með sér minni tilkostnað og þar með betri nýtingu á almannafé og sömuleiðis bætta umgengni við umhverfið,“ sagði Bjarni þegar skjalið var undirritað með rafrænum skilríkjum í síma hans.

Rafæn skilríki eru einu rafrænu auðkennin sem hægt er að nýta til fullgildrar undirritunar. Skilríkin hafa verið í umræðunni undanfarið, ekki síst í ljósi netöryggis. Í tilkynningu ráðuneytisins segir að skilríkin veiti mesta öryggi sem í boði er, samkvæmt úttekt sérfræðinga. Öryggið er meðal annars fólgið í því að lykilorð eru hvergi geymd miðlægt.

Þá segir ráðuneytið alla hafa hag af því að nota rafræn skilríki, þau létta fólki lífið á margan hátt. Til að mynda fækkar lykilorðum, auk þess sem notkun þeirra hefur í för með sér tímasparnað, getur dregið úr fyrirhöfn og auðveldað aðgengi að sífellt fjölbreyttari rafrænni þjónustu. Hér má nefna skattayfirvöld, ýmis fyrirtæki og stofnanir.

Fjármála- og efnahagsráðuneytið hefur vakið athygli á mikilvægi öryggis rafrænna skilríkja og hvetur fólk til þess að nýta þau. Rafræn skilríki eru fáanleg á debetkortum og nýlega var farið að gefa þau út í farsímum, sem gerir notkunina einfaldari.