Töp hjá Íslendingaliðunum í kvöld

Íslendingaliðin Bergischer HC og TV Emsdetten töpuðu bæði leikjum sínum í þýsku úrvalsdeildinni í handbolta í kvöld, Bergischer HC á útivelli á móti TuS N-Lübbecke en Emsdetten á heimavelli á móti HSV Hamburg.

Björgvin Páll Gústavsson og félagar í Bergischer HC töpuðu 30-38 á móti TuS N-Lübbecke en TuS N-Lübbecke var 22-14 yfir í hálfleik. Þetta var þriðja tap Bergischer HC í röð og fyrir vikið komst TuS N-Lübbecke upp fyrir Björgvin Pál og félaga í töflunni.

Ólafur Bjarki Ragnarsson og Ernir Hrafn Arnarson skoruðu báðir fjögur mörk og Oddur Gretarssonar var með eitt mark þegar Emsdetten tapaði 31-37 á heimavelli á móti sterku liði HSV Hamburg. Domagoj Duvnjak skoraði níu mörk fyrir HSV Hamburg og Hans Lindberg var með átta mörk.