Þarf að hvíla í fimm vikur í viðbót

Arnór Þór Gunnarsson mun ekki geta spilað aftur með liði sínu, Bergischer, fyrr en um miðjan næsta mánuð.

Hornamaðurinn skemmtilegi greinir frá því á Twitter-síðu sinni í kvöld að læknar segi að hann þurfi að bíða í fimm vikur í viðbót þar til hann má spila á nýjan leik.

Arnór kjálkabrotnaði í leik fyrir sjö vikum síðan og þá þegar var ljóst að hann yrði lengi frá.

Hann er byrjaður að æfa með liðinu en má ekki vera með af fullum krafti strax en getur þó haldið sér í góðu líkamlegu formi.