EVE Online í MoMa - "Markmiðið var aldrei að skapa list“

Leikjaheimi EVE Online, þekktustu afurðar íslenska tölvuleikjafyrirtækisins CCP, er nú hampað í einu virtasta listasafni veraldar, nútímalistasafninu í New York eða MoMa. Þrettán aðrir tölvuleikir taka þátt í sýningunni, þar á meðal eru Pacman, Tetris og Portal.

Sýningin stendur í ellefu mánuði og ber heitið Applied Design. Hópur sérfræðinga stóð að valinu á þeim fjórtán leikjum sem á endanum tóku þátt í sýningunni.

Torfi Frans, listrænn stjórnandi CCP, segir það vera mikinn heiður að fá að taka þátt í sýningunni enda fagnar EVE Online nú tíu ára afmæli.

„Það er búið að framleiða ótrúlegan fjölda tölvuleikja," segir Torfi. „En það að EVE Online hafi verið hópi þessa fjórtján leikja er auðvitað alveg stórkostlegt."

Torfi og samstarfsmenn hans áttuðu sig fljótt á því að það yrði flókið verkefni að setja saman sýningu um söguheim EVE Online.

„Við áttuðum okkur á því að það yrði ekki nóg að sýna leikinn, það er, að vera með tölvu, lyklaborð og mús. Það var því ákveðið að leggja áherslu á sýna söguheim EVE Online sem slíkan í stað sjálfrar spilunarinnar."

Eins og svo oft áður reyndist samfélag spilara CCP dýrmætt. Torfi bað spilara um taka upp glæsileg andartök úr EVE Online og birta myndskeiðin á YouTube. Þeim var síðar safnað saman og eru þessi myndbönd eru nú til sýnis í MoMa.

Listfræðingar og fagurkerar hafa lengi vel deilt um það hvort að tölvuleikir séu yfir höfuð list. Torfi er nokkuð viss um að áherslubreyting hafi orðið í þessum efnum.

„Við höfum aldrei sagt að við séum að skapa list með þróun EVE Online," segir Torfi. „Þetta byrjaði árið 1999 sem skemmtun. Þegar leikurinn kom svo út árið 2003 vorum við búnir að sá þessu litla fræi sem seinna meir — með uppfærslum og DUST 514 — varð svo stórt og fallegt."