Eitt íslenskt mark í Meistaradeildarsigri Kiel

Kiel vann þriggja marka sigur á franska liðinu Dunkerque, 28-25, í Meistaradeild Evrópu í handbolta í kvöld. Þetta var fimmti sigur Kiel í sex leikjum í riðlakeppni Meistaradeildarinnar á þessu tímabili.

Íslensku landsliðsmennirnir í liði Kiel voru rólegir í kvöld. Aron Pálmarsson skoraði eitt mark og Guðjón Valur Sigurðsson var ekki meðal markaskorara. Dominik Klein var markahæstur í liði Kiel með fimm mörk.

Dunkerque var með frumkvæðið í byrjun leiks og 7-5 yfir eftir ellefu mínútna leik. Þá komu fjögur mörk Kiel í röð og Kiel var síðan 15-12 yfir í hálfleik. Kiel náði mest fimm marka forskoti í seinni hálfleik en Dunkerque minnkaði muninn í eitt mark, 25-24, þegar sjö mínútur voru eftir. Kiel vann lokakafla leiksins 3-1 og tryggði sér þriggja marka sigur.

Kiel vann þarna annan sigurinn á liði Dunkerque á skömmum tíma en áður höfðu lærisveinar Alfreðs Gíslasonar unnið átta marka sigur í leik liðanna í Frakklandi, 29-21.