Arnar og Svavar dæma í Meistaradeildinni

Það verður stór stund hjá dómaraparinu Arnari Sigurjónssyni og Svavari Péturssyni þann 30. nóvember. Þá dæma þeir í fyrsta skipti í Meistaradeildinni.

Þeir félagar munu dæma leik Dunkerque og Kielce sem fram fer í Dunkerque. Þeir verða ekki einu Íslendingarnir á parketinu því Þórir Ólafsson leikur með Kielce.

Það er einnig brjálað að gera hjá eftirlitsmönnum HSÍ út um allar trissur.

Kristján Halldórsson verður eftirlitsmaður á leik Aarhus Haandbold og HV Zomimak í EHF-keppni karla en leikið verður í Árósum laugardaginn 23.nóvember.

Gunnar K. Gunnarsson verður eftirlitsmaður á leik Aalborg Handball og HK Drott Halmstad í Meistaradeild karla sunnudaginn 24.nóvember en leikið verður í Gigantuim Höllinni í Álaborg þar sem íslenska landsliðið mun spila leiki sína í riðlakeppni EM í janúar.

Ólafur Örn Haraldsson verður eftirlitsmaður á leik Lugi HF og A.E.K. Aþenu í EHF-keppni karla en leikið verður í Lundi laugardaginn 30.nóvember.