Markvörður Kiel búinn að græða 110 milljónir á þrem vikum

Lukkan leikur við sænska markvörðinn Johan Sjöstrand, leikmann Kiel, en hann hefur grætt ótrúlega peninga á veðreiðum síðustu vikur.

Á dögunum vann hann 70 milljónir króna á veðreiðum. Hann lét ekki þar við sitja því þrem vikum síðar tók hann inn tæpar 40 milljónir króna við sömu iðju.

"Þetta er algjörlega ótrúlegt," sagði Sjöstrand við sænska blaðið Expressen en hann fékk tíðindin eftir Meistaradeildarleikinn gegn Dunkerque á miðvikudag.

Hann fékk tíðindin um 70 milljón króna vinninginn eftir leik gegn Löwen. Hann er því eflaust farinn að spretta í símann eftir leiki þessa dagana.

Sjöstrand er mikill hestaáhugamaður og á sjálfur sex hesta. Hann er að íhuga að kaupa þann sjöunda. Hvað segja félagar hans hjá Kiel samt við þessu?

"Þeir hlæja bara," sagði hinn moldríki sænski markvörður.

Alfreð Gíslason, þjálfari Kiel, var spurður út í veðmál markvarðarins á dögunum. "Mér er alveg sama hvað hann gerir utan vallar á meðan hann er með 50 prósent markvörslu í leikjum."