Flensburg á toppinn eftir sigur á Kiel

Flensburg gerði sér lítið fyrir í dag og pakkaði Þýskalandsmeisturum Kiel saman, 34-30. Yfirburðir Flensburg miklir og markvörður þeirra, Mattias Andersson, átti ótrúlegan leik.

Drengirnir hans Alfreðs Gíslasonar voru ekki á tánum í fyrri hálfleik og gengu til leikhlés sjö mörkum undir, 21-14. Það gerist svo sannarlega ekki á hverjum degi að Kiel fái á sig yfir 20 mörk í einum hálfleik.

Svíinn Mattias Andersson var frábær í marki Flensburg en landar hans í markinu hinum megin vörðu ekki blöðru.

Flensburg hélt áfram að þjarma að gestunum í síðari hálfleik og þegar um 20 mínútur lifðu leiks var munurinn kominn í átta mörk, 26-18.

Kiel er þekkt fyrir endurkomur sínar en engin slík kom í dag. Kiel er því í öðru sæti eftir leikinn, einu stigi á eftir Flensburg.

Aron Pálmarsson skoraði fjögur mörk fyrir Kiel í dag og Guðjón Valur Sigurðsson þrjú.