Reynsluboltarnir höfðu betur að Ásvöllum

Lið Hauka 2 vann 30-28 sigur á Fylkismönnum í 32-liða úrslitum Coca Cola bikars karla í handbolta í kvöld. Margar gamlar kempur skipa lið Hafnfirðinga.

Leikurinn í kvöld var hörkuspennandi og jafnt á flestum tölum. Um 118 áhorfendur sáu gestina úr Árbænum, sem leika í næstefstu deild, berjast við leikmenn Hauka sem sumir hverjir eru komnir af léttasta skeiði.

Staðan í hálfleik var 13-13 en Haukar höfðu frumkvæðið í síðari hálfleik. Um tíma voru þrír leikmanna Fylkis utan vallar en þeir gáfust þó ekki upp. Reyndar fengu Fylkismenn aðeins fjórar brottvísanir í heildina en tímasetning þriggja var á hálfrar mínútu kafla.

Þegar uppi var staðið höfðu heimamenn tveggja marka sigur 30-28.

Halldór Ingólfsson skoraði sex mörk fyrir Hauka líkt og hornamaðurinn Þorkell Magnússon. Gylfi Gylfason skoraði fimm mörk og örvhenti kollegi hans, Einar Örn Jónsson, fjögur mörk. Auk þeirra léku Jón Karl Björnsson, Sigurjón Sigurðsson og Sigurjón Bjarnason með Hafnarfjarðarliðinu ásamt fleirum.

Hjá gestunum var Heimir Orri Magnússon atkvæðamestur með sex mörk en Bergur Guðjóns Jónasson, Jón Þór Kristjánsson og Arnar Már Bjarnason skoruðu fimm mörk hver.

Haukar 2 eru því komnir í 16-liða úrslitin þar sem þeir gætu mætt „liðsfélögum“ sínum úr Haukum.