Auðvelt hjá PSG í Sviss | Kolding fyrst til að vinna Kielce

PSG átti ekki í neinum vandræðum með Wacker Thun í Sviss í dag í Meistaradeildinni í handbolta og vann öruggan 6 marka sigur 34-28 á botnliði C-riðils. Á sama tíma skellti Kolding Kielce í Danmörku 29-24.

PSG náði fljótt öruggu forskoti í leiknum í Sviss og var leikurinn í raun aldrei spennandi. Sex mörkum munaði í hálfleik 16-10 og nær komst Thun aldrei.

Róbert Gunnarsson skoraði tvö mörk í leiknum en Ásgeir Örn Hallgrímsson komst ekki á blað.

Fahrudinn Melic var markahæstur hjá PSG með sjö mörk. Antonio Garcia og Marko Kopljar skoruðu fimm mörk hvor. Reto Friedli skoraði sex mörk fyrir Thun og Lukas Von Deschwanden fimm.

PSG er í fjórða sæti riðsilsins með fimm stig, með stigi meira en Dinamo Minsk og stigi á eftir Metalurg. Wacker Thun er á botninum án stiga.



Danska liðið Kolding frá Kaupmannahöfn gerði sér lítið fyrir og skellti Targi Kielce frá Póllandi 29-24 í Danmörku í dag.

Fyrir leikinn var Kielce með fullt hús stiga en Kolding hafði tapað einum leik líkt og Kiel í riðlinum. Það er ekki spurt að því þegar inn á völlinn er gengið og var Kolding mikið sterkari aðilinn í leiknum.

Kolding var 17-12 yfir í hálfleik og hleypti Kielce aldrei það nálægt sér að leikurinn yrði spennandi.

Albert Rocas var markahæstur hjá Kolding með 8 mörk. Bo Spellerberg skoraði 7 mörk og Stefan Hundstrup 5.

Ivan Cupic skoraði mest fyrir Kielce, 6 mörk og Michal Jurecki 4. Þórir Ólafsson náði ekki að nýta færi sín í leiknum og skoraði ekki.

Liðin eru jöfn á toppi B-riðils með átta stig í fimm leikjum.