Innlent

Dæmdur fyrir að misnota kreditkort

Stígur Helgason skrifar
Páll Heimisson ásamt verjanda sínum, Guðrúnu Sesselju Arnardóttur, við fyrirtöku í Héraðsdómi Reykjavíkur 5. mars síðastliðinn.
Páll Heimisson ásamt verjanda sínum, Guðrúnu Sesselju Arnardóttur, við fyrirtöku í Héraðsdómi Reykjavíkur 5. mars síðastliðinn. Fréttablaðið/GVA
Páll Heimisson var í dag dæmdur í tólf mánaða fangelsi fyrir stórfelld umboðssvik með því að misnota kreditkort sem hann hafði til umráða sem starfsmaður íhaldshóps Norðurlandaráðs og kaupa sér með því vörur og utanlandsferðir fyrir alls rúmar nítján milljónir króna. Níu mánuðir refsingarinnar eru skilorðsbundnir.

Sem starfsmaður íhaldshópsins hafði Páll aðsetur í Valhöll. Kreditkortið var á nafni Sjálfstæðisflokksins, og er Páli gert að endurgreiða flokknum milljónirnar nítján.

Páll var ekki viðstaddur dómsuppsöguna í dag, enda er hann búsettur í Rúmeníu þar sem hann stundar nám.

Sérstakur saksóknari gaf út ákæru á hendur honum vegna málsins 18. desember í fyrra og við fyrirtöku málsins í byrjun mars neitaði hann sök. Aðalmeðferð málsins fór fram 20. september síðastliðin.

Fréttablaðið fjallaði um ákæruna í desember. Úr henni mátti lesa að Páll hefði notað kreditkortið í sextán löndum á rúmlega tveggja ára tímabili og ferðast um þrettán Evrópulönd á tímabilinu að meðtöldu Íslandi; Danmörku, Svíþjóð, Bretland, Holland, Frakkland, Þýskaland, Austurríki, Tékkland, Króatíu, Ungverjaland, Kýpur og Rússland. Þá hafi hann farið til Líbanon, New York í Bandaríkjunum og Peking, höfuðborgar Kína.

Þá hafi tólf af milljónunum nítján verið teknar út úr hraðbanka sem reiðufé.

Guðrún Sesselja Arnardóttir, verjandi Páls, segir að ekki hafi verið tekin ákvörðun um hvort dómnum verði áfrýjað.





Fleiri fréttir

Sjá meira


×