Erpur halar inn stefgjöld í Ísrael

Tónlistamaðurinn og rapparinn Erpur Eyvindarson fékk nýverið greidd stefgjöld vegna notkunar á tónlist hans erlendis. Í ljós hefur komið að rapparinn nýtur nokkurra vinsælda í Ísrael ef marka má stefgjöld hans erlendis frá því þriðjungur af stefgjöldum kappans, utan Íslands, koma frá Ísrael. Erpur viðurkennir í samtali við Vísi að ekki sé um háa fjárhæð að ræða en segir ánægjulegt að vita til þess að tónlist sín sé vinsæl á Vesturbakkanum.

„Stefgjöld eru almennt ekki há og menn kaupa ekki marga bíla fyrir þessa upphæð. Raunar dugar þetta varla fyrir hjóli og líklega bara fyrir einum línuskauta,“ segir Erpur. Hann hefur enga skýringu á því hvers vegna tónlist hans er spiluð í Ísrael.

„Já, þetta kemur örlítið á óvart,“ segir Erpur sem í gegnum tíðina hefur lýst yfir andúð sinni á Ísraelsstjórn. „Ætli Vesturbakkinn og Gazasvæðið sé ekki að koma sterkt inn. Ég er ekki á móti Ísraelum yfir höfuð og það er fullt af góðu fólki í Írael. Ég er hins vegar á móti stjórnarskrárbundinni kynþáttahyggju.“

Einnig vinsæll í Japan

Tónlistin hjá Erpi ratar víða því Japanar virðast hafa tekið íslenska rapparanum opnum örmum. Þriðjungur stefgjalda Erps erlendis frá kemur frá Ísrael og annar þriðjungur frá Japan. „Yfirleitt hef ég verið að fá greitt frá Norðurlöndunum, Frakklandi, Þýskalandi og Bandaríkjunum. Það kemur því skemmtilega á óvart að vera fá stefgjöld frá Ísrael og Japan. Japaninn er reyndar duglegur að finna sér góða tónlist,“ segir Erpur. Hann kveðst ekkert hafa unnið að því að koma sér á framfæri erlendis þó hann hafi komið fram sem dæmi á Norðurlöndunum og í Þýskalandi. Nú gætu hins vegar opnast tækifæri á tónleikaferð í Ísrael og Japan ef marka má vinsældir kappans á þessum slóðum.

„Ég hef aldrei pælt í því að koma tónlistinni minni á framfæri erlendis. Ætli ég sé ekki eins og Megas í þeim efnum,“ segir Erpur og hlær. „Það væri freistandi að taka tónleikaferðalag um Gazasvæðið og Vesturbakkann og skella sér svo í kjölfarið til Japan.“

Hér á landi nýtur Erpur talsverðra vinsælda. Lagið Hvítir Skór, sem Erpur flytur ásamt Ásgeiri Trausta, var gríðarlega vinsælt hér á landi á síðasta ári og hefur samtals verið spilað í kringum 500 þúsund sinnum á Youtube. Nóg er að gera hjá Erpi um þessar mundir og von er á tveimur plötum frá kappanum. Ný sólóplata er í burðarliðnum en svo styttist einnig í nýja plötu frá XXX Rottweiler hundum. Erpur mun koma fram á Októberfest sem fram fer um helgina í risatjaldi við Háskóla Íslands.