Damon, McConaughey og Hathaway koma

Kvikmyndastjörnurnar Matt Damon, Matthew McConaughey og Anne Hathaway eru á leið til landsins til að vera í tökum kvikmyndar Christopher Nolans -- Insterstellar, samkvæmt heimildum fréttastofu.

Heldur betur ætlar að rætast úr þessu sumri sé litið til þess hversu mörg frægðarmenni sækja landið heim. "Frægrafólks-vísitalan" fer nú snarhækkandi. Í fyrra var algjör sprengja í þessum efnum en þá voru hér í tökum bandarískar kvikmyndir og þeim fylgdu margar kvikmyndastjörnur svo sem Ben Stiller og Tom Cruise. Í byrjun næsta mánaðar, eftir örfáa daga, koma svo til landsins Matt Damon, Matthew McConaughey og Anne Hathaway til að taka þátt í gerð myndarinnar Interstellar sem Cristopher Nolan leikstýrir.

Saga Film er eitt þeirra framleiðslufyrirtækja hefur haft í nægu að snúast í sumar við að aðstoða erlenda kvikmyndagerðarmenn sem hingað hafa viljað koma til að skjóta myndir sínar. Lilja Katrín Gunnarsdóttir er upplýsingafulltrúi hjá Saga Film og hún segir sumarið tímann og nóg að gera.

"Í þessari erlendu deild er nýlokið tökum á rússneskru myndinni Calculator, sem er svona geimvísindaframtíðarmynd með stórmeistaranum Vinnie Jones í einu af hlutverkunum. Svo er hér í tökum norsk mynd sem heitir Dead Snow 2. Og svo á borðinu staðfest eru allaveganna tvö verkefni sem eru aðeins stærri í sniðum. En ég get ekki farið nánar út í það á þessu stigi."

Norska myndin er forvitnileg, en hún fjallar um nasista-uppvakninga og er framhald á norskri mynd sem sló óvænt í gegn. Hún heitir Dauða snjór og skaut leikstjóranum Tommy Wirkola upp á stjörnuhimininn og hefur hann fengist við að leikstýra í Hollywood í kjölfar vinsældanna. Er talsvert meira lagt í framhaldið. "Mikið "action", mikið stuð og ganga tökur mjög vel," segir Lilja Katrín en tökum á þeirri mynd lýkur 20. september.