Kobe stefnir á að spila í desember

Kobe Bryant hefur einsett sér að byrja að spila með LA Lakers á nýjan leik í síðasta lagi í desember.

Bryant sleit hásin í apríl síðastliðnum og Lakers féll úr leik strax í fyrstu umferð úrslitakeppninnar.

„Ég stefni á nóvember eða desember. Það er mitt markmið og ég er mjög ákveðinn í að ná því,“ sagði hann við bandaríska fjölmiðla.

„Ég hef engar áhyggjur af hásininni enda þýðir það ekkert. Ef hún slitnar aftur þá gerist það bara. En þegar ég verð leikfær mun ég gefa allt mitt í þetta.“

Öllu jöfnu eru menn frá í 6-9 mánuði eftir slík meiðsli en Bryant er samningsbundinn Lakers til loka næsta tímabils.