Níu milljóna sekt fyrir orðbragð

Roy Hibbert, miðherji Indiana Pacers, hefur verið sektaður um 75 þúsund dali jafnvirði níu milljóna íslenskra króna fyrir orðaval sitt á blaðamannafundi.

Hibbert fór á kostum með Indiana í sigri á Miami Heat í sjötta leik liðanna í úrslitum Austurdeildar á laugardagskvöldið. Liðin mætast í sjöunda og síðasta skiptið í Miami í nótt þar sem í ljós kemur hvort liðið mætir San Antonio Spurs í úrslitaeinvígi deildarinnar.

Sekt Hibbert var tvíþætt. Annars vegar notaði hann orðasambandið „no homo" til þess að lýsa varnartilburðum sínum gagnvart LeBron James. Þannig var Hibbert að koma því til skila að þótt hann hefði verið ágengur í varnarleik sínum væri hann ekki samkynhneigður.

„Ég notaði slangur sem er hvorki við hæfi í einkalífi mínu eða opinberlega og á klárlega ekki heima í sjónvarpi," sagði Hibbert í yfirlýsingu um orðaval sitt.

Þá notaðist Hibbert við ófagurt orðbragð til að lýsa íþróttafréttamönnum.

„Þótt Roy hafi beðist afsökunar sem er vafalítið einlæg þá er nauðsynlegt að sekt hann til að sýna að orðaval sem þetta verði ekki liðið í NBA," sagði David Stern framkvæmdastjóri NBA-deildarinnar í yfirlýsingu.