Rakarinn fagnar nýrri aðferð gegn skalla

„Það verður meira að gera hjá rakaranum þegar allir verða komnir með hár,“ segir Torfi Geirmundsson hárskeri á Hárhorninu við Hlemm.

Ný rannsókn, svokölluð vampíruaðferð, gefur nýja von um að nú sé komið fram óbrigðult ráð gegn skalla; vandamáli sem fylgt hefur mannkyni frá örófi alda. Torfi fagnar þessu að vonum og sér fyrir sér að meira verði að gera á rakarastofunni.

Torfi segir skallavandamálið hafi fylgt mannkyni frá upphafi og ýmislegt hafi verið gert til að reyna að finna lausn á þessu. „Af þessu eru sagnir allt aftur til Kleópötru. Orðið skallavandamál kom fyrst fram í orðabók árið 90 eftir Krist, las ég einhvers staðar.“

Ríkir hafa af þessum minni áhyggjur

Menn hafa gert eitt og annað og margur ætlað sér að verða ríkur á þessu með því að finna upp allskyns elexíra sem eiga að lækna skalla: „En þetta hefur gefist misvel. Að meðaltali eru þetta 7 prósent þjóða sem eiga við þetta að stríða; drúgur fjöldi og þetta getur verið mikið tilfinningamál.“

Að sögn Torfa gefa rannsóknir það til kynna að þeir hinir ríku hafi minnstar áhyggjur af þessu enda þurfi þeir ekki að hafa eins miklar áhyggjur af því að ganga í auguná hinu kyninu.

„Það er helst millistéttin sem hefur af þessu áhyggjur. Þá hefur því lengi verið haldið fram að þetta sé ekki gott fyrir pólitíkusa því þetta komi niður á kjörþokka. Á miðöldum, þegar hárkollutískan kom fram, þá var það vegna þess að menn höfðu misst hárið í tengslum við það að hafa fengið sýfilis og vildu fela það.“

Hefur trú á vampíruaðferðinni

Torfi segist hafa nokkra trú á vampíruaðferðinni og rekur það í löngu og fræðilegu máli á hverju hann byggir þá skoðun sína. En, hann hefur helst áhyggjur af því að þessi aðferð skili líkamshári en ekki venjulegu hári.

„Þetta er örugglega á byrjunarstigi. Árið 1997 héldu vísindamenn því fram að þetta lægi í ættum, og konur sem eru með þetta í sínu genamengi fái blöðrur á eggjastokka. Sama ráð á að gagnast við þessu hvorutveggja en þá sögðu menn að lausnar væri að vænta eftir sex ár en það bólar ekki á því enn.“