Vill Lýð í 18 mánaða fangelsi

Stígur Helgason skrifar 8. maí 2013 09:52

Sérstakur saksóknari vill Lýð Guðmundsson í átján mánaða fangelsi.

Ólafur Þór Hauksson, sérstakur saksóknari, krefst átján mánaða fangelsisdóms yfir Lýði Guðmundssyni í Exista-málinu svokallaða. Þá krefst hann sex til átta mánaða fangelsisdóms yfir lögmanninum Bjarnfreði Ólafssyni. Þessar kröfur setti hann fram í málflutningsræðu sinni í Héraðsdómi Reykjavíkur nú í morgun.

„Sé einhvern tímann ástæða til að beita refsiákvæðum hlutafélagalaganna af fullum þunga þá er það í þessu máli,“ sagði Ólafur. Refsisramminn fyrir slík brot er tvö ár. Málið snýst um fimmtíu milljarða hlutafjárhækkun Existu í desember 2008, sem einungis var greiddur fyrir einn milljarður króna. Hann var að auki fenginn að láni frá Lýsingu.

Ákæruvaldið segir þetta í augljósri andstöðu við 16. grein hlutafélagalaga um að ekki megi greiða minna en nafnverð fyrir hluti og fullyrðir að eini tilgangurinn með fléttunni hafi verið að tryggja Lýði og bróður hans Ágústi áframhaldandi yfirráð yfir Existu eftir að Nýja Kaupþing opinberaði áform sín um að taka félagið yfir.

Ólafur sagði málið fordæmalaust. „Brot ákærðu eru stórfelld og stuðluðu að því að ákærði Lýður eignaðist stóran hlut í almenningshlutafélagi með ólögmætum hætti,“ sagði hann. „Það er vandséð í hvaða tilfellum er hægt að brjóta af sér með alvarlegri hætti gagnvart hlutafélagalögum.“

Verjendur Lýðs og Bjarnfreðs munu nú tala máli skjólstæðinga sinna. Vísir flytur frekari fréttir af málflutningnum í dag.

Tengdar fréttir

Lýður kannast ekki við varnaðarorð Deloitte

Lýður Guðmundsson, fyrrverandi stjórnarformaður Existu, kannast ekki við það að endurskoðandi félagsins hjá Deloitte hafi tjáð honum að 50 milljarða hlutafjáraukning Existu stæðist ekki lög og Deloitte gæti aldrei skrifað upp á hana. Hann sagðist fyrir dómi fyrr í morgun ekki muna til þess að það hafi komið fram í símtali hans og endurskoðandans Hilmars Alfreðssonar.

6. maí 2013 10:54

Deloitte kvartaði til Logos

Forsvarsmenn endurskoðunarfyrirtæksins Deloitte sendu kvörtunarbréf til lögmannsstofunnar Logos þegar þeim varð ljóst að skýrsla sem endurskoðendur fyrirtækisins höfðu unnið um hlutafjáraukningu Existu hefði verið notuð til að koma henni í gegn hjá Fyrirtækjaskrá. Frá þessu greindu bæði Þorvarður Gunnarsson, forstjóri Deloitte á Íslandi, og endurskoðandinn Hilmar Alfreðsson frá fyrir dómi nú eftir hádegi.

6. maí 2013 15:06

Eftirlitsaðilar sáu ekkert athugavert

Eftirlitsaðilar sáu ekkert athugavert við hlutafjáraukninguna í Existu fyrr en hálfu ári eftir að hún var um garð genginn. Þeim var þó fullkunnugt um að einungis hefði einn milljarður verið greiddur fyrir 50 milljarða hlutafjáraukningu.

6. maí 2013 12:52

Aðalmeðferð hefst í dag í málinu gegn Lýði og Bjarnfreði

Aðalmeðferð í máli sérstaks saksóknara gegn Lýði Guðmundssyni og Bjarnfreði Ólafssyni verður í Héraðsdómi Reykjavíkur í dag.

6. maí 2013 08:50

Bjarnfreður var fullur efasemda

Bjarnfreður Ólafsson, lögfræðingur á Logos, segir að hann og aðrir starfsmenn Logos hafa verið fulla efasemda um að það mundi standast að greiða einungis einn milljarð fyrir 50 milljarða hlutafjáraukningu í Existu, eins og Lýður og Ágúst Guðmundssynir gerðu í desember 2008.

6. maí 2013 11:26

Segir Fyrirtækjaskrá hafa verið blekkta

Forstöðumaður Fyrirtækjaskrár viðurkennir að ólöglærður starfsmaður hafi gert mistök þegar 50 milljarða hlutafjáraukning Existu var samþykkt í desember 2008. Hins vegar hafi Fyrirtækjaskráin vísvitandi verið blekkt með villandi tilkynningu.

8. maí 2013 07:00

Töldu öll Deloitte hafa vottað viðskiptin

Fyrri degi aðalmeðferðar í Exista-máli sérstaks saksóknara er nú lokið. Vitnaleiðslum verður fram haldið í fyrramálið og að því loknu tekur málflutningur saksóknara og verjenda við.

6. maí 2013 17:17