Hagnaður MP banka jókst um yfir 400 milljónir milli ára

465 milljóna króna hagnaður varð af rekstri MP banka á fyrsta ársfjórðungi ársins eftir skatta samanborið við 22 milljóna króna hagnað á fyrsta ársfjórðungi í fyrra. Hagnaður fyrir tekju- og bankaskatta nam 433 milljónum króna.

Í tilkynningu segir að fyrsti ársfjórðungur ársins sé besti ársfjórðungur í rekstri bankans frá upphafi.  Góð afkoma var af rekstri og námu hreinar rekstrartekjur 1.105 milljónum króna á fyrsta ársfjórðungi og hafa vaxið um 35% á milli ára. Aukning vaxta- og þóknanatekna nam um 26% á milli ára.

Hreinar vaxtatekjur voru 473 milljónir króna og hreinar þóknanatekjur 420 milljónir króna á fyrsta ársfjórðungi 2013. Hreinar fjárfestingatekjur voru 143 milljónir króna samanborið við 82 milljónir króna á fyrsta ársfjórðungi 2012. Hlutdeildarfélög skiluðu 14 milljóna króna hagnaði.

Um helmingur af afkomu skýrist af endurheimtum af sértækum niðurfærslum  en niðurfærslur voru jákvæðar um 221 milljón á fyrsta ársfjórðungi.

Heildareignir námu 63 milljörðum króna við lok fyrsta ársfjórðungs. Útlán jukust um 1,8 milljarða og námu alls 29,6 milljörðum króna. Innlán að meðtöldum peningamarkaðsinnlánum námu 47,9 milljörðum króna í lok fyrsta ársfjórðungs.

Eiginfjárhlutfall bankans var 12% í lok fyrsta ársfjórðungs. Lögbundið eiginfjárhlutfall er 8% að lágmarki. Allt eigið fé bankans fellur undir eiginfjárþátt A.

„Það er afar ánægjulegt að geta skilað góðu uppgjöri í upphafi árs. Það gekk vel að vinna til baka hluta af því sem við höfum fært niður á móti eldra lánasafni, en um helmingur afkomunnar skýrist af því. Reglubundinn rekstur er jafnframt að skila mjög góðri afkomu. Við leggjum um þessar mundir allt kapp á að velja verkefni okkar og viðskiptavini vel og erum ánægð með gæði þess lánasafns sem verið er að byggja upp. Þá hefur okkur tekist vel að halda sterkri stöðu okkar á verðbréfamarkaði,“ segir Sigurður Atli Jónsson, forstjóri MP banka í tilkynningunni