Gunnsteinn Ómarsson ráðinn bæjarstjóri Ölfuss

Bæjarstjórn Ölfuss hefur gengið frá ráðningu Gunnsteins R. Ómarssonar sem bæjarstjóra. Hann tekur til starfa frá og með 16. maí nk. til enda yfirstandandi kjörtímabils.

Í tilkynningu segir að Gunnsteinn R. Ómarsson sé 43 ára viðskiptafræðingur með mastersgráðu í fjármálum og alþjóðaviðskiptum og hefur víðtæka stjórnunar- og rekstrareynslu, ekki síst á sveitarstjórnarstiginu, þar sem hann hefur áður starfað sem sveitarstjóri í um 6 ár. Gunnsteinn er giftur Berglindi Ósk Haraldsdóttur og eiga þau 4 dætur á leik- og grunnskólaaldri.

„Bæjarstjórn bindur miklar vonir við komu nýs bæjarstjóra en vill um leið þakka Ólafi Erni Ólafssyni, núverandi bæjarstjóra fyrir störf hans fyrir sveitarfélagið og óskar honum velfarnaðar á nýjum starfsvettvangi,“ segir í tilkynningunni.