Mætast tvisvar sinnum með lið sín á einum sólarhring

Ingi Þór Steinþórsson, þjálfar báða meistaraflokkana hjá Snæfelli í körfuboltanum og sömu sögu er að segja af Ágústi Sigurði Björgvinssyni sem þjálfar báða meistaraflokkana hjá Val. Á næsta sólarhring mætast þeir tvisvar sinnum með lið sín.

Kvennaliðin mætast fyrst en þau spila í Fjárhúsinu í Stykkishólmi klukkan þrjú í dag í 15. umferð Dominos-deild kvenna. Snæfell hefur unnið tvo fyrstu deildarleiki liðanna í vetur örugglega eða með 16 og 34 stigum en Valskonur tefla fram nýjum bandarískum leikmanni í þessum leik.

Karlaliðin mætast síðan á morgun í átta liða úrslitum bikarkeppninnar en leikurinn hefst klukkan 16.00 í Vodafonehöllinni á Hlíðarenda. Snæfell er í 2. sæti Dominos-deildar karla en Valsmenn eru á toppnum í 1. deildinni og unnu alla deildar- og bikarleiki sína fyrir áramótin.