Kristrún Ösp eyddi afmælisdeginum í læknastúss

Kristrún Ösp Barkardóttir athafnakona og mamma með meiru sem búsett er á Akureyri fagnaði 23 ára afmælinu sínu í gær.

Við höfðum samand við afmælisstelpuna og forvitnuðumst hvernig dagurinn hennar var og hvernig aldurinn leggst í hana á þessum síðustu og verstu.

Hræðist ekki að eldast 

„Sumt fólk hræðist það að eldast og reyndar nokkuð margir haldnir þessum ótta. Það á ég erfitt með að skilja. Að eldast er akkúrat það sem lífið snýst um, sanka að sér reynslu, visku, góðu fólki og tækifærum," segir Kristrún Ösp og heldur áfram: 

„Það er ekki sjálfgefið að eldast og við ættum ávallt að hafa það í huga.  Ég er þakklát fyrir hvert ár sem líður fyrir það eitt að fá að vera hérna. 

Hvert ár verð ég reynslunni ríkari, læri stöðugt eitthvað nýtt, reyni að bæta mig í því sem mér finnst ég ekki gera nægilega vel og þroskast á öllum sviðum. Ég horfi á lífið með mun skýrari gleraugum en fyrir nokkrum árum, einnig voru hlutir sem mér þótti heldur venjulegir eða ómerkilegir orðnir fallegir og algjört undraverk," segir Kristrún.

Fékk fjölskylduna í heimsókn á afmælisdaginn

„Afmælið mitt hefur aldrei verið neitt tiltökumál fyrir mér, lítið frábrugðið hinum dögum ársins fyrir utan afmæliskveðjur og heimsóknir sem eru auðvitað dásamlegar ásamt gjöfum frá vinum og fjölskyldu sem voru ótrúlega fallegar. Einnig var góð gjöf að yfirlit yfir heimsóknir á Hún.is fyrr vikuna voru rosalega góðar og við höfum haldið okkur í tíunda sæti yfir vinsælustu vefi á Íslandi," segir Kristrún en hún er ein af eigendum Hún.is sem er flott vefsvæði sem hóf göngu sína á netinu í september í fyrra.

Dagurinn fór í læknastúss 

„Dagurinn fór í það að vera heima með son minn sem er veikur, ásamt því að bíða eftir símatíma hjá lækni. Hljómar ekki mjög spennandi en jákvæðni getur gert allt skemmtilegt og þessi dagur var hreint frábær því ég fékk að eyða honum með þessum snilling sem kallar mig mömmu og öðru góðu fólki sem heimsótti mig í dag," segir afmælisstelpan að lokum.

Lífið tók forsíðuviðtal við Kristrúnu í fyrra - sjá hér.