Rhein-Neckar Löwen lagði Bergischer HC | Kiel áfram á sigurbraut

Alexander Petersson, Stefán Rafn Sigurmannsson, Rúnar Kárason og félagar í Rhein-Neckar Löwen höfðu betur gegn Björgvini Páli Gústavssyni og félögum í Bergischer HC í þýsku deildinni í handbolta í dag. Alexander skoraði fjögur mörk, Stefán eitt en Rúnar komst ekki á blað í leiknum.

Þá unnu lærisveinar Alfreðs Gíslasonar öruggan sigur á TSV Hannover-Burgdorf í dag. Aron Pálmarsson var sterkur í liði Kiel með fimm mörk og Guðjón Valur Sigurðsson bætti við tveimur mörkum.

Kiel situr áfram eitt og sér í toppsæti þýsku deildarinnar eftir leiki dagsins, fimm stigum á undan Füsche Berlin í öðru sæti. Rhein-Necker Löwen færir sig upp í þriðja sæti með sigrinum en Flensburg og HSV Hamburg eiga leiki til góða.