Eitt brýnasta hagsmunamálið framundan

Teiknaðar hafa verið sviðsmyndir af því hvaða áhrif losun fjármagnshafta og nauðasamningar þrotabúa bankanna geti haft á íslenskan fjármálastöðugleika. Samráðsnefnd um fjármálastöðugleika hefur verið virkjuð. Katrín Júlíusdóttir, fjármála- og efnahagsráðherra, greindi frá þessu á fundi ríkisstjórnarinnar í morgun.

„Við erum búin að vera að teikna sviðsmyndir af stöðunni, hvernig við gætum leyst málin fram í tímann og hvernig við gætum varið íslenska hagsmuni sem best án þess að brjóta lög eða þjóðréttarlegar skuldbindingar okkar. Og hvaða áhrif útflæði á fjármunum mun hafa á fjármálastöðugleikann, samkvæmt ólíkum sviðsmyndum," segir Katrín sem bætir því jafnframt við að þarna sé um að ræða eitt brýnasta hagsmunamál íslensku þjóðarinnar.

„Nú er komið að ákveðnum vendipunkti í því. Nú þarf að fara að byggja á þessari mynd sem er komin í þessari stöðu og fara í aktívar aðgerðir til að leysa þessi mál," segir Katrín. „Við erum búin að virkja aftur stýrinefnd um losun fjármagnshafta," segir Katrín. Hún sjálf stýrir nefndinni en auk hennar sitja í nefndinni seðlabankastjóri, atvinnu- og nysköpunarráðherra og forstjóri Fjármálaeftirlitsins. Katrín tekur skýrt fram að það verði engar reglur gefnar út af hálfu Seðlabankans sem heimili undanþágur til uppgjörs þrotabúanna án þess að stýrinefndin hafi farið yfir þær.

Katrín segist ekkert geta sagt til um það hvort það geti orðið að nauðarsamningum þrotabúanna á þessu ári. „Það fer allt eftir því hvenær við erum tilbúin til að veita undanþágurnar og hvenær menn eru komnir á einhverja niðurstöðu um að þetta muni ekki hafa þann áhrif á fjármálastöðugleika að þetta muni allt skella á íslenskum heimilum og fyrirtækum af einhverjum krafti," segir Katrín.

Þá tekur Katrín fram að hún hafi lagt áherslu á að halda öðrum stjórnmálaflokkum upplýstum um gang mála. „Sama hver verður hér í fjármálaráðuneytinu að loknum kosningum, að þá er lílklegt að viðkomandi muni þurfa að taka ákvörðun í málinu og þá er mikilvægt að viðkomandi þekki málið vel," segir hún.