Bikinímyndir af prinsessu sagðar smekklegar

Alfonso Signorini, ritstjóri ítalska slúðurtímaritsins Chi, segir bikinímyndir þær sem blaðið hyggst birta af Kate Middleton, hertogaynjunni af Cambridge og eiginkonu Vilhjálms prins, vera sárasaklausar.

Signorini segir í samtali við BBC að myndirnar séu svo venjulegar að takmarkað sé minnst á þær á forsíðu blaðsins. Hann segir jafnframt að myndirnar, sem keyptar hafi verið af alþjóðlegum myndabanka, varpi síður en svo rýrð á hjónin, en þær voru teknar í sumarfríi þeirra í Karabíska hafinu.

Talsmaður konungsfjölskyldunnar hefur sagt birtinguna vera klárt brot á friðhelgi einkalífs þeirra hjóna, en ritstjórinn segir svo ekki geta verið þar sem myndirnar séu af opinberum persónum á opinberum stað, og undir berum himni í þokkabót.

„Það sem lesendur okkar munu sjá er fallegt augnablik hjá brosandi og hamingjusömu pari. Hvað er hneykslanlegt við það?"