Norðmenn skelltu Dönum sem unnu samt mótið

Noregur vann Danmörku 32-26 þegar liðin mættust í síðustu umferð Bring Cup æfingamótsins í handbolta sem leikið var í Noregi um helgina. Danmörk vann engu að síður mótið.

Danmörk hafði áður unnið Króatíu og Frakkland sem bæði höfðu unnið Noreg í mótinu og því voru úrslitin ráðin áður en síðasta umferðin hófst.

Norðmenn seldu sig dýrt í leiknum og fór Magnus Dahl mikinn í marki liðsins, sérstaklega í seinni hálfleik.

Danmörk var þremur mörkum yfir í hálfleik 17-14 og komst Danmörk í 20-16 en þá fór allt í baklás hjá Dönum og Norðmenn léku við hvurn sinn fingur.

Noregur skoraði 16 mörk gegn sex og vann sanngjarnan sigur gegn einu besta handboltaliði heims.

Espen Lie Hansen skoraði 7 mörk fyrir Noreg og Sander Sagosen og Magnus Gullerud 5 en Gullerud var að auki valinn maður leiksins.

Mikkel Hansen skoraði 6 mörk fyrir Danmörku og Mads Christiansen 5.