Þjálfari Frakka: Jafnteflið við Ísland vonandi bara slys

Jean-Claude Giuntini, þjálfari U-17 liðs Frakka, sagði að fótboltinn geti stundum verið grimm íþrótt. Frakkar misstu 2-0 forystu gegn Íslandi í 2-2 jafntefli í fyrsta leik liðanna á EM U-17 liða í Slóveníu í gær.

Gunnlaugur Birgisson og Hjörtur Hermannsson skoruðu mörk Íslands á síðustu 25 mínútum leiksins eftir að Frakkarnir komust 2-0 yfir.

„Það er eðlilegt að leikmenn geri mistök í fyrsta leiknum í svona frábærri keppni," sagði Giuntini í viðtali á heimasíðu UEFA eftir leikinn í gær.

„Ég held að við höfum talið að leikurinn væri unninn þegar við komumst 2-0 yfir. Fótboltinn er grimmur en þetta varð niðurstaðan," bætti hann við.

„Ég vona að þetta hafi bara verið slyst og að við gerum okkur seka um svona hegðun bara í fyrsta leiknum. Áhyggjuefnið er að við vorum nokkuð frá okkar besta - við getum bætt okkur."

Gunnar Guðmundsson, þjálfari Íslands, var vitanlega ánægður með niðurstöðuna. „Við sýndum mikla skapgerð og baráttuvilja. Okkar styrkleiki liggur í að nýta föst leikatriði."

„Við áttum erfitt uppdráttar í upphafi leiksins. Frakkland er með fljóta leikmenn og okkar strákar áttu erfitt með að venjast þeirra hraða leikstíl. En við bættum okkur eftir því sem leið á leikinn."

„Spennustigið hjá strákunum var gott fyrir leikinn. Þeir voru afslappaðir og þó svo að þeir hafi lent undir gegn sterku frönsku liði misstu þeir aldrei trúna og komu til baka."