Umfjöllun, viðtöl og einkunnir: ÍBV - Fylkir - 1-1

Eyjamenn og Fylkir skildu jöfn 1-1 í fjórðu umferð Pepsi-deildar karla í knattspyrnu en leikurinn fór fram á Hásteinsvelli í Vestmannaeyjum.

Eyjamenn léku með vindinn í bakið í fyrri hálfleiknum og reyndu að nýta sér það. Það var greinilega dagskipunin frá Magnúsi Gylfasyni, þjálfara ÍBV, að láta skotin dynja um leið og færi gæfist.

Heimamenn skoruðu síðan fljótlega fyrsta mark leiksins eftir tæplega korters leik þegar Víðir Þorvarðarson hamraði boltann í netið lengst utan af velli, frábært mark og alveg óverjandi fyrir Bjarna Þórð í markinu.

Gestirnir komu sterkir til baka og voru ekki lengi að jafna metin en Ásgeir Eyþórsson, leikmaður Fylkis, skallaði boltann í netið eftir frábæra hornspyrnu frá Magnúsi Þóri Matthíassyni. Staðan var því 1-1 í hálfleik.

Vindurinn jókst til muna í síðari hálfleiknum og það bitnaði mikið á leiknum og gæðum hans. Liðið áttu erfitt með hafa stjórn á boltanum og halda honum niðri.

Bæði lið fengu tækifæri til að hirða stigin þrjú en allt kom fyrir ekki og leiknum lauk með 1-1 jafntefli. Hvorugt liðið hefur því náð að vinna leik í Pepsi-deildinni í ár og það er hlutur sem þau vilja bæði lagfæra.

Finnur Ólafsson: Alltaf gaman að koma til Eyja„Mér líður bara virkilega vel og alltaf gaman að koma til Eyja og yndislegt í Eyjum en það hefði verið skemmtilegra að fara með þrjú stig heim."

„Eins og leikurinn þróaðist áttum við seinni hálfleik með vindi og hefðum mátt setja meiri pressu á þá í seinni hálfleik en það vantaði aðeins meiri gæði fram á við til að klára þetta."

„Ég er aðeins tæpur vegna meiðsla og þarf bara að komast í stand. Ég er þungur á mér en þetta er allt í réttu horfi hjá mér, ég tek þetta bara skref fyrir skref."

Magnús Gylfason: Þessi byrjun er einfaldlega ekki nægilega góð hjá okkur„Það eru gríðarleg vonbrigði að ná bara einu stigi í dag," sagði Magnús Gylfason, þjálfari ÍBV, eftir leikinn í dag.

„Við erum mjög ósáttir að vera bara með tvö stig eftir fjóra leiki, það er engu að leyna um það."

„Við skoruðum snemma leiks með vindinum svo ég hélt að það myndi gefa okkur svolítinn kraft og vorum búnir að ákveða að keyra grimmt á þá. Svo jafna þeir óvænt úr hornspyrnu þar sem við sofum á verðinum og það svæfði fyrri hálfleikinn fannst mér."

„Mér fannst seinni hálfleikur miklu betri, við reyndum að spila fótbolta og halda boltanum niðri í vindinum og sköpuðum þó nokkuð mikla hættu en það tókst ekki í dag að klára það.

Víðir Þorvarðarson: Ánægður með markið en ekki úrslitin„Ég er ánægður með markið en óánægður með úrslitin," sagði Víðir Þorvarðarson, markaskorari ÍBV, eftir leikinn.

„Mér fannst í sjálfu sér aldrei vera nein hætta en við fengum svo á okkur mark úr horni sem á ekki að gerast í liði eins og ÍBV, það á að henda sér á þessa bolta og vinna þá. Þess vegna er ég mjög ósáttur að hafa tapað á því."

„Við verðum að fara að byrja þetta mót, þetta er ekki nógu gott svona. Þetta er langt frá okkar markmiðum."