Enginn betri en Þórir

Norska kvennalandsliðið í handbolta er nú ríkjandi heims-, Evrópu- og ólympíumeistari eftir sigur liðsins á Svartfjallalandi, 26-23, í úrslitaleik handboltakeppninnar á leikunum í London um helgina.

Selfyssingurinn Þórir Hergeirsson er þjálfari liðsins en þrátt fyrir að liðið hafi átt ótrúlegri velgengni að fagna á síðustu áratugum (21 verðlaun á stórmótum, þar af níu gull) er þetta í fyrsta sinn sem liðið er handhafi allra titlanna samtímis.

Þórir var áður aðstoðarþjálfari Marit Breivik í átta ár áður en hann tók við liðinu árið 2009.

Misstum aldrei trúna„Það er gott að spila fyrir Þóri enda er hann góður þjálfari," sagði hornamaðurinn Camilla Herrem við Fréttablaðið eftir leikinn, með gullið um hálsinn. „Hann fékk mikla gagnrýni á sig á meðan mótinu stóð en hann sýndi núna öllum Norðmönnum að hann er sá besti í faginu."

Norska liðinu gekk illa í upphafi mótsins og endaði í fjórða sæti síns riðils. En eftir sigur á Brasilíu í fjórðungsúrslitum hefur liðið sýnt allar sínar bestu hliðar.

„Við misstum aldrei trúna, allra síst Þórir. Við höfum alltaf stutt hann – sama hvað aðrir hafa sagt," bætti Herrem við.

Sjálfur var Þórir yfirvegunin uppmáluð á meðan úrslitaleiknum stóð, sem og eftir hann þegar sigurinn var í höfn.

„Þórir er alltaf mjög rólegur í leikjunum og það hentar okkur fullkomnlega. Við gætum aldrei verið með rússneskan þjálfara," sagði Herrem og hló.

Lítil auðmýkt og miklar kröfurÞórir sagði sjálfur að leiðin að gullinu hafi verið erfið og að hann sé afar stoltur af leikmönnum og sínu samstarfsfólki.

„Við vorum lengi að koma lykilmönnum í gang og þess fyrir utan eru geysilega miklar væntingar gerðar til liðsins. Það er lítið um auðmýkt í kringum okkur en mikið um kröfur," sagði Þórir.

„En það er góður andi í liðinu og starfsteyminu. Það gerði það að verkum að við náðum að finna okkar gildi og aðferðir sem við viljum nota í móti sem þessu."

Áskoranir hvetja mig áframÞórir er nýbúinn að skrifa undir nýjan fjögurra ára samning við norska handboltasambandið og fer því fljótlega að huga að því að byggja upp nýtt lið til framtíðar.

„Auðvitað er maður algjör vitleysingur að skrifa undir svona lagað eftir þennan árangur," sagði hann í léttum dúr. „En ég hef mjög gaman af starfinu, bæði að vinna með þessum leikmönnum og sambandi sem hefur mikinn metnað og setur liðinu stór markmið. Það hvetur mann áfram enda er ég þannig gerður að ég nýt mín best þegar ég þarf að takast á við miklar áskoranir."