Skora á FME að stöðva "skaðlega framgöngu“ Lýsingar

Samtök lánþega segja framkomu Lýsingar gagnvart viðskiptavinum sínu undanfarin ár hafa einkennst af „blekkingum, lagasniðgöngu og flótta frá skýrum dómaniðurstöðum," eins og það er orðað í tilkynningu frá félaginu vegna afstöðu Lýsingar til nýfallins dóms sem Lýsing telur ekki eiga við um sig.

Helgi Hjörvar, þingmaður Samfylkingarinnar og formaður efnahags- og viðskiptanefndar Alþingis, hefur kallað forsvarsmenn Lýsingar á fund nefndarinnar í fyrramálið til þess að útskýra afstöðu sína frekar.

Samtök lánþega eru hinsvegar harðorð í garð Lýsingar og segja að í ljósi þess hvernig fyrirtækið „vinnur gegn hagsmunum lánþega og þess, á hve veikum fjárhagslegum grunni fyrirtækið stendur, þá er ófært annað en að benda á að slíku fyrirtæki er ekki mögulegt að treysta lengur," eins og það er orðað.

Þess vegna hvetja samtökin lánþega til þess að halda eftir greiðslum til fyrirtækisins þannig að ekki hljótist „réttindamissir af". Svo skora samtökin á FME að grípa tafarlaust inn í málið og stöðva það sem samtökin vilja meina að sé skaðleg framganga Lýsingar.