Lýsing segir dóminn ekki eiga við sig - Helgi vill frekari svör

Lýsing telur að dómur Hæstaréttar á fimmtudag um gengistryggð lán eigi ekki við um sitt lánasafn og mun því ekki ráðast í endurútreikninga. Formaður efnahags- og viðskiptanefndar segir Lýsingu þurfa að útskýra þá afstöðu nánar og hefur kallað forsvarsmenn fyrirtækisins aftur á fund nefndarinnar ásamt lögfræðingum.

Efnahags- og viðskiptanefnd Alþingis fundaði með forsvarsmönnum Lýsingar og Dróma í dag vegna vaxtadóms Hæstaréttar á fimmtudag en samkvæmt dómnum var Arion banka óheimilt að reikna vexti afturvirkt af ólöglegum gengistryggðum lánum, þar sem stefnandi, Borgarbyggð í þessu tilviki, hafði staðið í skilum og fullnaðarkvittanir lágu fyrir.

„Drómi hefur þegar hafið vinnu við endurútreikning ólöglegra gengislána eins og Landsbanki Íslands og ég vona að hinir bankarnir fylgi í kjölfarið en Lýsing hins vegar telur að dómurinn frá því á fimmtudag eigi ekki við um þeirra lánasafn," segir Helgi Hjörvar, þingmaður Samfylkingarinnar og formaður efnahags- og viðskiptanefndar.

Helgi segir þá afstöðu Lýsingar koma sér á óvart og leitaði verði frekari svara.

„Ég tel í fljótu bragði að fordæmisgildi dómsins á fimmtudaginn fyrir bílalán og önnur slík lán sé umtalsverður og við höfum þess vegna kallað Lýsingu fyrir á okkar fund aftur á miðvikudaginn og munum þar fara yfir málin með fulltrúum þeirra á nýt og fá þar sérfræðinga á lögfræðisviði til þess að leiðbiena okkur í málinu og kalla eftir því að þeir leiðrétti það sem hægt er að leiðrétta sem allra fyrst," segir Helgi.

Hann segir bankana þurfa að uppfylla loforð við sína viðskiptavini með því að hefja endurútreikning.

„Bankarnir hvöttu fólk til þess að koma og semja til þess að gera eitthvað í sínum málum og lofuðu að það myndi alltaf njóta þess ef að það kæmi betri réttur seinna og þess vegna hlýtur það fólk líka að njóta sömu stöðu og sömu kjara eins og þeir sem að borguðu," segir Helgi að lokum.