Áfengissýki aldraðra vaxandi vandamál

Áfengissýki aldraðra er vaxandi vandamál. Þetta segir Valgerður Rúnarsdóttir, yfirlæknir hjá SÁÁ. Hún segir umhugsunarvert að verið sé að færa áfengissölu inn á dvalar- og hjúkrunarheimili aldraðra. Fréttablaðið skýrði frá í fyrradag að til stendur að breyta borðsal heimilisfólks á Hrafnistu í kaffihús þar sem hægt verður að kaupa bjór og vín.

„Þeir sem að búa á þessum heimilum hafa auðvitað aðgengi að áfengi eins og aðrir. Ef það þarf að færa áfengi nær þeim vegna þess að þeir eigi í erfiðleikum með að komast á aðra vínveitingastaði veltir maður því fyrir sér hvort það sé vegna veikinda og þá getur maður ekki annað en hugsað um hvort það sé ástæða til að stuðla að drykkju áfengis hjá veikum. Það er ein hliðin og ég velti því fyrir mér hvað liggur að baki þessara hugmynda og fyrir hvern þetta er," segir Valgerður Rúnarsdóttir, yfirlæknir hjá SÁÁ

Hún segir áfengisvanda eldri borgara hafa vaxið undanfarið ár. Vandinn sé oft duldari meðal þeirra eldri þar sem meiri skömm fylgir alkahólmisma á efri árum.

Þá segir hún geta verið varhugavert fyrir eldra fólk sem þurfi að taka lyf að drekka. Bæði geti áfengið dregið úr virkni lyfja eða aukið hana sem geti verið mjög varasamt. „Þetta getur gert það valtari á fótum og haft aukaverkanir sem eru mjög óæskilegar. Svo er það þannig að eftir því sem maður eldist þolir maður minna áfengismagn. Það er bara líkamleg og líffræðileg ástæða fyrir því. Þannig það er auðvitað full ástæða að ráðleggja fullorðnu fólk að drekka ekki áfengi, í það minnsta að halda því mjög í lágmarki, þannig ég sé enga sérstaka ástæða til að stuðla að því að drykkja aldraðra verði meir en þegar gerist," segir Valgerður.