Rúgbrauðsát dregur úr líkum á blöðruhálskrabbameini

Næring á mismunandi æviskeiðum og tengsl hennar við áhættu á krabbameini í blöðruhálskirtli. Svo hljóðar yfirskift rannsóknar Jóhönnu Eyrúnar Torfadóttur, næringarfræðings sem ver doktorsritgerð sína í næsta mánuði.

Rannsókn Jóhönnu hefur vakið mikla athygli en hún er talin ein fyrsta sinnar tegundar. Við athuganir sínar bar hún saman gögn Hjartaverndar og Krabbameinsskrár til að greina hvort fæða á yngri árum hafi áhrif á áhættuna á því að fá krabbamein í blöðruhálskirtli síðar á ævinni. Þátttakendur voru 9115 karlmenn fæddir á árunum 1907-1936.

Þótt blöðruhálskrabbamein sé algengasta krabbamein meðal karla á á Vesturlöndum er lítið vitað um orsakir þess og skimanir fyrir því hafa ekki gefið góðan árangur. Vonast er því til að niðurstöðurnar geti nýst við forvarnir.

Niðurstöður rannsóknarinnar sýna að búseta í sveit á unga aldri á fyrri hluta tuttugustu aldar tengist áhættu á að greinast með langt gengið blöðruhálskrabbameini. Ennfremur sást tenging milli tíðrar neyslu á mjólk á unglingsárum og reyktum og söltuðum fiski við aukna áhættu á langt gengnu krabbameini í blöðruhálsi. Hins vegar virtist mikið rúgbrauðsát á unglingsárum og reglubundin neysla á lýsi á efri árum draga úr áhættunni.

Þá bendir Jóhanna á að í dýrarannsóknum hafi það sýnt sig að rúgbrauð hefur jákvæð áhrif á þróun krabbameins í blöðruhálskirtil.