Skurðlæknir fundinn fyrir Neskaupstað

Fæðingar geta farið fram áfram á fjórðungssjúkrahúsinu í Neskaupstað, en sjúkrahúsið náði í dag samningum við vanan skurðlækni sem mun fylla í skarð vegna veikinda þess sem var skráður á vaktina.

Vísir hefur sagt frá því að vegna veikinda læknis færu ekki fram skurðaðgerðir þar næstu tvær vikurnar, frá og með mánudegi og ekki væri hægt að taka á móti börnum þar. Einar Rafn Haraldsson, forstjóri HSA, segir í yfirlýsingu að einungis ein kona hafi átt að fæða á umræddum tíma á sjúkrahúsinu.

Þá bendir Einar Rafn á að rangfærslur hafi verið í fréttaflutningi af málinu. Aldrei hafi staðið til að loka fæðingardeildinni eða sjúkrahúsinu vegna veikindanna.