Með Mirstrument á Sónar

Mugison og Ásgeir Trausti hafa bæst í hóp þeirra listamanna sem koma fram á Sónar-hátíðinni sem verður haldin í fyrsta sinn í Hörpu í febrúar. Mugison ætlar að koma fram með nýja og endurbætta útgáfu af hljóðfærinu sínu Mirstrument en hann kom einmitt fram á Sónar í Barselóna 2003 og þótti standa sig einkar vel. Meðal annarra sem hafa bæst við dagskrána eru Daninn Kasper Björke, Valgeir Sigurðsson, Samaris, Ghostigital, Pedro Pilatus, Captain Fufanu og Sísý Ey. Áður hafa James Blake, Squarepusher, Modeselektor, Gus Gus, Retro Stefson og fleiri boðað komu sína á hátíðina. Búist er við fjölda erlendra gesta á Sónar, auk þess sem erlendir fjölmiðlar hafa boðað komu sína.