Engin breyting á afstöðu til NATO

Utanríkisráðherrar Finnlands og Svíþjóðar segja viljayfirlýsinguna um þátttöku í loftrýmisgæslu Íslands í samstarfi við Noreg ekki fela í sér breytingu á afstöðu til eða samstarfi við NATO. Ríkin eru ekki meðlimir í bandalaginu og hafa ekki tekið þátt í viðlíka verkefnum áður.

„Við höfum gert það ljóst að loftrýmisgæsla Finnlands við Ísland er ekki til marks um breytt viðhorf eða samstarf við NATO. Það er algerlega útilokað,“ hefur Hufvudstadsbladet í Finnlandi eftir Erkki Tuomioja, utanríkisráðherra Finnlands.

Carl Bildt, utanríkisráðherra Svíþjóðar, tekur í sama streng og segir verkefnið í líkingu við eftirlit sem flugherir ríkjanna sinna nú þegar í sameiningu yfir Lapplandi, Finnmörku og Norður-Svíþjóð. Það eina sem breytist sé staðsetningin.

„Svíar og Finnar geta ekki og munu ekki taka yfir verkefni NATO á Íslandi,“ sagði Bildt.

Sænskar og finnskar flugvélar munu taka þátt í loftrýmisgæslunni þegar hún er á höndum Norðmanna, en slíkt ber næst upp á vorið 2014.

Komi til þess að óboðinn gestur stefni til Íslands mega Svíar og Finnar einungis ljósmynda og reyna að bera kennsl á viðkomandi flugvél. Gerist frekari aðgerða þörf verður það á könnu Norðmanna að bregðast við.

Nánari útfærsla á verkefnum liggur ekki enn fyrir, enda á NATO eftir að taka málið fyrir og þjóðþing ríkjanna munu svo samþykkja verkefnið að lokum.