Stækka hlustendahópinn í gegnum sjónvarpsþætti

Lag með hljómsveitinni Steed Lord hljómaði undir dansatriði í sjónvarpsþættinum So Yo Think You Can Dance sem sýndur var á Fox-sjónvarpsstöðinni á miðvikudagskvöld í síðustu viku. Þetta er í annað sinn sem lag með sveitinni er notað í þættinum.

Dansatriðið var úr smiðju danshöfundarins Sonyu Tayeh sem er góð vinkona og samstarfskona söngkonunnar Svölu Björgvinsdóttur og félaga hennar í Steed Lord.

„Við höfum unnið mikið með Sonyu, bæði við gerð tónlistarmyndbanda og að nokkrum danssýningum hér í Los Angeles. Sonya bað okkur um tónlist við atriðið og við útsettum útgáfu af nýjasta laginu okkar, Precognition, sérstaklega fyrir þáttinn sem var sýndur á miðvikudagskvöldið. Dansatriðið var ótrúlega fallegt og viðtökurnar svakalega góðar," útskýrir Svala.

Lagið Vanguardian með Steed Lord var notað í þættinum í fyrra og í kjölfarið rauk lagið upp raftónlistarlistann á iTunes og sat hæst í ellefta sæti. Svala segir hljómsveitina hafa fengið ágæta summu frá Fox Network fyrir notkunina á laginu en vildi ekki gefa upp nákvæma upphæð. „Maður fær auðvitað borgað fyrir þetta allt og svo er þetta óneitanlega mjög góð auglýsing fyrir hljómsveitina og getur opnað margar dyr fyrir manni. Við höfum lagt aukna áherslu á að koma tónlist okkar að í sjónvarpi og kvikmyndum á þessu ári og það hefur gengið vel hingað til."

Lög með sveitinni hafa einnig heyrst í þáttum á borð við Keeping Up With The Kardashians, MTV's Real World og fleiri raunveruleikaþáttum sem sýndir eru á E!, HV1 og MTV. „Við vinnum með fyrirtæki sem sérhæfir sig í því að koma tónlist okkar á framfæri í sjónvarpi og bíói og það er frábær leið til að stækka hlustendahópinn," segir Svala að lokum.