Böðvar um Helga og Brynjar: Kunna allt upp á tíu

Landsliðsmennirnir Helgi Már Magnússon og Brynjar Þór Björnsson hafa ákveðið að koma heim og spila með KR í Dominos-deildinni í körfubolta á næstu leiktíð. Þetta er gríðarlegur liðstyrkur fyrir KR-liðið en báðir þessir leikmenn eru uppaldir KR-ingar og því á leiðinni heim í Vesturbæinn. Helgi Már er 30 ára framherji en Brynjar er 24 ára skotbakvörður.

„Já, þetta er alveg pottþétt, við eigum bara eftir að fá þá til að kvitta undir samning," sagði Böðvar Guðjónsson, formaður körfuknattleiksdeildar KR við Fréttablaðið í gær.

„Það eru frábærar fréttir fyrir alla að fá eitthvað af þessum íslensku strákum heim í deildina. Eru ekki allir búnir að fá upp í háls af einhverjum þremur til fjórum útlendingum í liði? Þetta eru bara tveir heimatilbúnir KR-ingar sem eru að mæta til leiks sem vita um hvað þetta snýst í Vesturbænum og vita hvaða kröfur og hvaða metnað klúbburinn hefur. Þeir kunna þetta allt upp á tíu," sagði Böðvar.

Báðir urðu þeir Íslandsmeistarar með KR þegar þeir spiluðu síðast í íslensku deildinni, Helgi veturinn 2008-9 og Brynjar 2010-11.

Helgi Már hefur leikið í Svíþjóð undanfarin þrjú tímabil með Solna, Uppsala og 08 Stockholm en Brynjar Þór reyndi fyrir sér með Jämtland í sænsku úrvalsdeildinni á síðasta tímabili.

„Þetta er mjög jákvætt fyrir Vesturbæinn og ég held að það séu miklu fleiri sem vilja koma á leiki hjá okkur eftir að þessir tveir strákar komu," sagði Böðvar.

Brynjar segir það aðeins formsatriði að ganga frá þessu.

„Það er lítið búið að vera að gerast úti og þetta er örugga leiðin. Það er samt einhver fyrirvari í þessu að ég geti farið ef það kemur eitthvað spennandi," sagði Brynjar.

„Ég er búinn að vera vanur því að vinna síðustu árin sem ég hef spilað með KR og ef við Helgi komum báðir þá er þetta orðinn ágætlega sterkur mannskapur," sagði Brynjar. „Það verður sterkur kjarni af KR-ingum í liðinu og það er það sem KR-ingar vilja. Að vera með nóg af KR-ingum í liðinu og vera að berjast um titla," sagði Brynjar.